Santiago, 13 de abril de 2011.- O conselleiro de Economía e Industria, Javier Guerra, acompañado polo director xeral do Instituto Galego de Promoción Económica (Igape), Joaquín Varela de Limia, inaugurou hoxe o primeiro Foro de Investimento Galicia AT Venture, no que adiantou a habilitación dun novo fondo de capital risco para empresas de base tecnolóxica, orzado en 20 millóns de euros.
Javier Guerra, salientou que a Consellería de Economía e Industria puxo en marcha este Foro para localizar proxectos innovadores "con gran potencial de crecemento" e poñelos en contacto con investidores, tanto públicos como privados. O encontro, organizado polo Igape e Bic Galicia, forma parte do proxecto europeo At Venture, que une ás rexións atlánticas na tarefa de mellorar os mercados de capital risco.
ImageNeste sentido, o Conselleiro de Economía e Industria destacou a importancia do programa de apoio á iniciativa emprendedora do seu departamento, que inclúe liñas directas con subvencións a fondo perdido, como no caso do re-Emprende, ou para a concesión de préstamos avalados e subsidiados, ao amparo do re-Imaxina, así como fondos de capital risco xestionados por XesGalicia como: o Emprende, o Xes-Innova e o Xes-Posobilita. Programa ao que a Consellería, que dirixe Javier Guerra, engadirá un novo fondo de capital risco impulsado pola Dirección Xeral de I+D+i, para investir en iniciativas de base tecnolóxica.
O titular de Economía e Industria sinalou que "os fondos de investimento, xunto coas redes de 'business angels', representan hoxe unhas alternativas de financiamento empresarial moi interesantes", que fan necesaria a convocatoria deste primeiro Foro de Investimento Galicia 2011, celebrado coa colaboración das redes galegas de 'business angels': Uniban, Bang, InnoBan e RedInvest; e contando coa asistencia das sociedades de capital risco galegas públicas, semipúblicas ou privadas: Xesgalicia, Unirisco, Vigo Activo e Venture Well, e coa presenza de numerosos empresarios e investidores privados.
No encontro tivo lugar a presentación de 7 proxectos, escollidos entre mais de 60 iniciativas. Guerra destacou o "alto grao de compromiso" dos finalistas: Aqualgae, Argonáutica Grupo Náutico, Asired Servizos Telemáticos, Confirmsign, Hentopharma, Ikimap e Teimas Desenvolvemento, que en total investiron máis de 1 millón de euros , na posta en marcha das súas propostas.
Ademais, todos eles tiveron a oportunidade de validar e perfeccionar a presentación das súas iniciativas, no Taller de Presentación de Proxectos a Investidores da Venture Academy, que forma parte fundamental deste Foro. Deste xeito, os seleccionados expuxeron proxectos do máximo interese, para as ramas de actividade relacionadas coa acuicultura e biotecnoloxía, o control e xestión de residuos, a náutica, o turismo e as novas tecnoloxías da comunicación.
O conselleiro tamén sinalou a importancia da campaña de convocatoria e información, que se ten posto en marcha contando coa web http://www.foroinversiongalicia.com e coas redes sociais de Facebook e Twitter, que sumaron preto de 400 seguidores. Ao tempo que avanzou a apertura dunha canle en Yotube, ao que se subirán os vídeos da xornada e as entrevistas realizadas sobre os proxectos finalistas, así como as fotografías do Foro, en Flickr.
O encontro albergou tamén a celebración dunha mesa redonda, coa participación de membros de redes de investidores en Galicia como Bang, Uniban, RedInvest ou InnoBan e mais unha conferencia sobre as claves que fan un proxecto atractivo para os investidores, de Alejandro Suárez Sánchez-Ocaña, empresario e "business angel".
O Foro de Investimento Galicia desenvólvese no marco do programa europeo AT Venture que persegue a promoción e desenvolvemento de empresas innovadoras, así como a súa difusión e mellora do acceso aos instrumentos de financiamento destas start-ups, especialmente sociedades e redes de investimento privado.
